मुख्यमंत्री आणि मुख्य न्यायमूर्तींच्या बैठकीसाठी प्रयत्नशील : श्री.राजेश क्षीरसागर
मुंबई : प्रतिनिधी : कोल्हापूर, सांगली, सातारा, सोलापूर, रत्नागिरी व सिंधुदुर्ग या सहा जिल्ह्याकरिता कोल्हापूर येथे उच्च न्यायालयाचे खंडपीठ स्थापन व्हावे अशी मागणी गेली ३० वर्षापासून होत आहे. मुंबई उच्च न्यायालयाचे खंडपीठ स्थापन व्हावे, याकरिता सहाही जिल्ह्यातील जनतेने, वकील, पक्षकार, आदींनी मागणी केली आहे. कोल्हापूर येथे उच्च न्यायालयाचे खंडपीठ स्थापन व्हावे या मागणीकरिता मागील ३० वर्षापासून आंदोलन सुरु आहे. सुमारे १ कोटी ५८ हजार जनता, १७ हजार वकील आणि पक्षकारांची कोल्हापुरात खंडपीठ व्हावे हि रास्त मागणी आहे. सुमारे ६२ हजार खटले प्रलंबित आहेत. कोल्हापूर जिल्ह्यातील ग्रामीण भागातील शेवटचे टोक मुंबई पासून सुमारे ७८० किलोमीटर च्या आसपास आहे. तेथून मुंबई येथे येणे जाणे, वकिलांची फी हे ग्रामीण भागातील जनतेच्या आवाक्याबाहेरील आहे. पिढ्या अन पिढ्या लोकांना न्यायाच्या प्रतीक्षेत थांबावे लागते, शिवाय या सहाही जिल्हातून मुंबई प्रवास तेथील न्यायालयीन कामकाज खर्च या सर्व बाबीची पूर्तता करण्यात प्रसंगी सर्वसामान्याची वर्षभराची कमाई यात घालवावी लागते. यासह कोल्हापूर येथे संस्थान काळात मे.उच्च न्यायालय कार्यरत होते. मे.उच्च न्यायालयाच्या एकूण कामाच्या ५६% इतक्या प्रमाणात कोल्हापूर जिल्हा न्यायालयात खटले दाखल होतात.
महाराष्ट्र राज्याच्या तत्कालीन मुख्यमंत्री महोदयांनी दि.१२ नोव्हेंबर २०१२, दि.७ सप्टेंबर २०१३, दि.१७ जुलै २०१५, दि.२८ फेब्रुवारी २०१८, दि.१९ जुन २०१९ आणि दि.८ मार्च २०२२ रोजीच्या पत्रांनी मुंबई उच्च न्यायालयाच्या तत्कालीन मुख्य न्यायाधीशांकडे कोल्हापूर, सांगली, सातारा, सोलापूर, रत्नागिरी आणि सिंधुदुर्ग या सहा जिल्ह्यातील अधिकार क्षेत्राचा वापर करण्याकरिता कोल्हापूर येथे मुंबई उच्च न्यायालयाचे खंडपीठ/ सर्किट बेंच स्थापन करण्याबाबतचा पत्रव्यवहार केला आहे. खंडपीठ कृती समितीच्या शिष्ठमंडळाने दि.१० मार्च २०२२ रोजी मा.मुख्य न्यायमूर्तींची भेट घेतली आहे. १९८४ साली औरंगाबाद येथे मुंबई उच्च न्यायालयाचे खंडपीठ स्थापन झाल्यानंतर राज्यातील दक्षिणेकडील प्रदेशात समाविष्ठ असणाऱ्या या सहा जिल्ह्यातून कोल्हापूर येथे खंडपीठ व्हावे, अशी सातत्याने मागणी करण्यात येत आहे. सद्यस्थितीत मा.मुख्य न्यायमूर्ती यांच्या कार्यालयाकडून खंडपीठ कृती समितीस पत्र व्यवहार करण्यात आला असून, सदर बाबततीत मा.मुख्य न्यायमूर्ती देखील सकारात्मक असून, मा.मुख्यमंत्री महोद्यांशी चर्चा करून याबाबतीत निर्णय घेणार असल्याचा उल्लेख केला आहे. सबब, उक्त प्रश्नी कोल्हापूर येथे उच्च न्यायालयाचे खंडपीठ स्थापन होणेकामी शासन स्तरावर मुख्यमंत्री नाम.मा.श्री.एकनाथ शिंदे साहेब आणि मा.मुख्य न्यायमूर्ती यांची बैठक आयोजित करण्यासाठी प्रयत्नशील असून, लवकरच खंडपीठ कृती समितीच्या शिष्ठमंडळाची मुख्यमंत्री नाम.श्री.एकनाथ शिंदे यांच्यासोबत भेट घडवून आणणार असल्याचे राज्य नियोजन मंडळाचे कार्यकारी अध्यक्ष श्री.राजेश क्षीरसागर यांनी प्रसिद्धी पत्रकात म्हंटले आहे.
Comments
Post a Comment