औरंगाबादची साक्षी चितलांगे व मुंबईची आश्ना मखिजा आघाडीवर :MPL 48 वी राष्ट्रीय महिला अजिंक्यपद बुद्धिबळ स्पर्धा

औरंगाबादची साक्षी चितलांगे व मुंबईची आश्ना मखिजा आघाडीवर : MPL 48 वी राष्ट्रीय महिला अजिंक्यपद बुद्धिबळ स्पर्धा

वंतीका, दिव्या, मेरी व विश्वा द्वितीय स्थानावर

कोल्हापूर २९ सिटी न्यूज नेटवर्क 

संजय घोडावत युनिव्हर्सिटी,अतिग्रे-रूकडी तालुका हातकणंगले येथे चालू असलेल्या MPL 48 वी राष्ट्रीय महिला अजिंक्यपद बुद्धिबळ स्पर्धेच्या चौथ्या फेरीनंतर आठवी मानांकित आंतरराष्ट्रीय महिला मास्टर औरंगाबादची साक्षी चितलांगे व विसावी मानांकित मुंबईची आंतरराष्ट्रीय महिला मास्टर अश्ना मखिजा या दोघी चार गुणासह संयुक्तपणे आघाडीवर आहेत.अग्रमानांकित आंतरराष्ट्रीय महिला ग्रँडमास्टर दिल्लीची वंतीका अग्रवाल, द्वितीय मानांकित गतविजेती महिला ग्रँडमास्टर नागपूरची दिव्या देशमुख, चौथी मानांकित महिला ग्रँडमास्टर मेरी आना गोम्स (पेट्रोलियम स्पोर्ट्स बोर्ड) व मुंबईची विश्वा शहा या चौघीजणी साडेतीन गुणासह संयुक्तपणे द्वितीय स्थानावर आहेत.तृतीय मानांकित आंतरराष्ट्रीय मास्टर पेट्रोलियम स्पोर्ट्स बोर्डची सौम्या स्वामीनाथन व पाचवी मानांकित अर्जुन पुरस्कार विजेती आंतरराष्ट्रीय मास्टर गोव्याची भक्ती कुलकर्णी सह एकूण 16 जण तीन गुणांसह संयुक्तपणे तृतीय स्थानावर आहेत.स्विस लीगने एकूण 11 फेऱ्यात होणाऱ्या या स्पर्धा 5 जानेवारीपर्यंत चालणार आहेत. दररोज सकाळी साडेदहा वाजता सामन्यास सुरुवात होते.

पहिल्या पटावर महाराष्ट्राच्या महिला फिडे मास्टर वृषाली देवधर व आंतरराष्ट्रीय महिला मास्तर साक्षी चितलांगी यांच्यात इंग्लिश ओपनिंग प्रकाराने सुरु झालेल्या प्रेक्षणीय लढतीत दोघांनीही तोडीस तोड चाली रचत डावावर वर्चस्व राखण्याचा प्रयत्न केला परंतु अनुभवी साक्षीने अंतिम पर्वात उंट व घोड्याच्या सुंदर चाली रचत डावावर निर्णयाक वर्चस्व ठेवत 47 व्या चाली अखेर वृषालीला शरणागती पत्करण्यास भाग पाडले.दुसऱ्या पटावर पश्चिम बंगालची मानांकित ब्रिस्टी  मुखर्जी व महाराष्ट्राची आंतरराष्ट्रीय मास्टर आश्ना मखिजा यांच्यातील बर्डस् ओपनिंग ने झालेल्या  प्रदीर्घ लढतीत डावाच्या मध्यात आश्नाने वर्चस्व राखत वजीराकडील बाजूने जोरदार हल्ला करत ब्रिस्टीचा बचाव भेदला व अखेर ५६व्या चालीला विजय संपादन केला.तिसऱ्या पटावर अग्रमानांकित दिल्लीच्या आंतरराष्ट्रीय महिला मास्टर वंतिका अग्रवाल व महाराष्ट्रची ऋतुजा बक्षी यांच्यातील स्लॉव्ह डिफेन्स ने रंगलेल्या डावात सुरुवातीपासून आक्रमक चाली रचणाऱ्या वंतिकाला ऋतुजाने अचूक प्रतिउत्तर देत डावात समतोल राखण्यात यश मिळवले होते परंतु अनुभवी वंतिकाने हत्ती व उंटाच्या नेत्रदीपक चाली रचत डावावर निर्णायक वर्चस्व राखले व 55 व्या चालीस ऋतुजावर मात केली.

चौथ्या पटावर  गतविजेत्या नागपूरच्या महिला ग्रँडमास्टर दिव्या देशमुख विरुद्ध केरळच्या निम्मी जॉर्ज यांच्यातील सिसीलयन बचाव प्रकाराने सुरू झालेल्या  डावाच्या मध्यपर्वात मजबूत स्थिती धारण करत दिव्याने 67 व्या चालीस निम्मीला डाव सोडण्यास भाग पाडले.पाचव्या पटावर पेट्रोलियम स्पोर्ट्स बोर्डच्या आंतरराष्ट्रीय महिला मास्टर सौम्या स्वामीनाथन विरुद्ध आंध्रप्रदेशच्या मोनिका बोमानी यांच्यात झालेल्या लढतीत डावाच्या मध्यपर्वात सौम्याने कल्पक चाली रचत एक प्याद्याची बढत मिळविली परंतु अंतिम पर्वात मोनिका ने दोन उंटाच्या साह्याने सुंदर बचाव करीत सौम्याला बरोबरीत रोखले.जळगावच्या सानिया तडवीने पेट्रोलियम स्पोर्ट्सवरच्या आंतरराष्ट्रीय मास्टर निशा मोहताला बरोबरीत रोखले तर तेलंगणाच्या कीर्ती गंटाने आयुर्विमा महामंडळाच्या महिला ग्रँडमास्टर स्वाती घाटेला बरोबरीत रोखून सर्वांचे लक्ष वेधून घेतले.