गोकुळ निवडणुकीत ९९.९६ टक्के मतदान! नामदार हसन मुश्रीफ, आमदार सतेज पाटील यांच्यासह दिग्गज नेत्यांनी बजावला मतदानाचा हक्क
फोटो : राज मकानदार
५,४१८ पैकी ५,४१६ मतदारांचे मतदान; गोकुळच्या सत्तेचा फैसला कोणाच्या बाजूने? निकालाकडे जिल्ह्याचे लक्ष
कोल्हापूर १८ सिटी न्यूज नेटवर्क
कोल्हापूर जिल्हा सहकारी दूध उत्पादक संघ अर्थात गोकुळच्या सन २०२६ ते २०३१ या पंचवार्षिक संचालक मंडळ निवडणुकीसाठी रविवारी (दि. १८ ऑक्टोबर) मतदान प्रक्रिया पार पडली. या निवडणुकीत मतदारांनी उत्स्फूर्त प्रतिसाद दिला असून, एकूण ५,४१८ मतदारांपैकी तब्बल ५,४१६ मतदारांनी मतदानाचा हक्क बजावला. त्यामुळे मतदानाची अंतिम टक्केवारी ९९.९६ टक्के इतकी नोंदविण्यात आली. या निवडणुकीत नामदार हसन मुश्रीफ, आमदार सतेज पाटील यांच्यासह दिग्गज नेत्यांनीही आपला मतदानाचा हक्क बजावला.
गोकुळ दूध संघाच्या निवडणुकीकडे संपूर्ण कोल्हापूर जिल्ह्याचे लक्ष लागले होते. सहकार क्षेत्रातील महत्त्वाची निवडणूक असल्याने दोन्ही बाजूंच्या पॅनेलसाठी ही निवडणूक प्रतिष्ठेची बनली होती. मतदानाच्या दिवशी मतदारांनी मोठ्या संख्येने मतदान केंद्रांवर उपस्थिती लावत आपला मतदानाचा हक्क बजावला.
पुरुष मतदारांचे वर्चस्व; महिलांचाही सहभाग
अंतिम आकडेवारीनुसार, एकूण ५,४१८ मतदारांपैकी ४,०३८ पुरुष आणि १,३७८ महिला मतदारांनी मतदान केले. एकूण मतदारांपैकी केवळ दोन मतदारांनी मतदानाचा हक्क बजावला नाही. त्यामुळे मतदानाची टक्केवारी ९९.९६ टक्क्यांवर पोहोचली.
तालुकानिहाय मतदानाची आकडेवारी
आजरा : ३०५ पैकी ३०४ मतदान
करवीर : ८६५ पैकी ८६५ मतदान
कागल : ६१९ पैकी ६१९ मतदान
गगनबावडा व गडहिंग्लज : ३९९ पैकी ३९८ मतदान
चंदगड : ४२३ पैकी ४२३ मतदान
पन्हाळा : ५१३ पैकी ५१३ मतदान
भुदरगड : ५९३ पैकी ५९३ मतदान
राधानगरी : ६९९ पैकी ६९९ मतदान
शाहूवाडी : ४४० पैकी ४४० मतदान
शिरोळ : २७० पैकी २७० मतदान
हातकणंगले : १६१ पैकी १६१ मतदान
गोकुळच्या सत्तेचा फैसला कोणाच्या बाजूने?
नामदार हसन मुश्रीफ, आमदार सतेज पाटील यांच्यासह दिग्गज नेत्यांनी मतदानाचा हक्क बजावल्याने या निवडणुकीचे महत्त्व अधोरेखित झाले. जवळपास शंभर टक्के मतदान झाल्यामुळे आता सर्वांचे लक्ष निकालाकडे लागले आहे. गोकुळच्या संचालक मंडळावर कोणत्या पॅनेलचे वर्चस्व राहणार आणि आगामी काळात दूध संघाची सूत्रे कोणाच्या हाती जाणार, याचे उत्तर मतमोजणीनंतर स्पष्ट होणार आहे.
Comments
Post a Comment