विविध मान्यवरांच्या भेटीगाठींनी शिक्षकमित्र कौस्तुभ गावडे यांच्या प्रचाराला वेग

 विविध मान्यवरांच्या भेटीगाठींनी शिक्षकमित्र कौस्तुभ गावडे यांच्या प्रचाराला वेग

कोल्हापूर ०८ सिटी न्यूज नेटवर्क 

 सातारा–सोलापूर–पुणे : पुणे विभाग शिक्षक मतदारसंघाच्या निवडणुकीच्या पार्श्वभूमीवर भाजप-महायुतीचे उमेदवार तथा शिक्षक मित्र कौस्तुभ मुरलीधर गावडे यांच्या प्रचाराला विविध जिल्ह्यांतील भेटीगाठींची जोड मिळत आहे. शिक्षक, शिक्षण संस्था, कर्मचारी संघटना तसेच विविध क्षेत्रांतील मान्यवरांशी संवाद साधत कौस्तुभ गावडे यांच्याकडून शिक्षकांच्या प्रश्नांवर चर्चा करण्यात येत आहे.

प्रचारदौऱ्यादरम्यान कौस्तुभ गावडे यांनी सातारा खासदार उदयनराजे भोसले, सातारा जिल्हा परिषदेचे माजी शिक्षण व अर्थ सभापती सुनील काटकर, सातारा आयटीआय संघटनेचे अध्यक्ष नेताजी बेचले सर, सोलापूरचे पालकमंत्री आणि ग्रामविकास मंत्री नामदार जयकुमार गोरे, शिल्पनिदेशक चिंतामणी काटवते, आर. वाय. जाधव तसेच पुणे माध्यमिक शिक्षक पतसंस्थेचे मार्गदर्शक गुलाबसिंग कदम यांची सदिच्छा भेट घेतली. या भेटींमध्ये शिक्षक मतदारसंघातील विविध प्रश्न, शैक्षणिक क्षेत्रातील बदल आणि शिक्षकांच्या प्रलंबित मागण्यांबाबत चर्चा झाल्याचे कौस्तुभ गावडे यांच्या प्रचारातील माहितीत सांगण्यात आले.

पुणे विभाग शिक्षक मतदारसंघाचा विस्तार लक्षात घेता पुणे, सातारा, सांगली, कोल्हापूर आणि सोलापूर या जिल्ह्यांतील शिक्षकांशी प्रत्यक्ष संपर्क साधणे हे उमेदवारांसमोरील महत्त्वाचे आव्हान आहे. या पार्श्वभूमीवर गावडे यांचा विविध जिल्ह्यांतील संपर्क दौरा सुरू असून, स्थानिक पातळीवरील शिक्षक प्रतिनिधी, शिक्षण क्षेत्रातील पदाधिकारी आणि संस्थाचालक यांच्या भेटींवर त्यांच्या प्रचारात भर दिला जात आहे.

शिक्षकांच्या सेवा-सुरक्षेपासून ते शैक्षणिक क्षेत्रातील मनुष्यबळ नियोजनापर्यंत अनेक विषय गावडे यांच्या प्रचारातील चर्चेच्या केंद्रस्थानी असल्याचे त्यांच्या समर्थकांकडून सांगण्यात येत आहे. NEP 2020 च्या अंमलबजावणीमुळे निर्माण होणाऱ्या कार्यभाराचा परिणाम प्राध्यापक पदसंख्येवर होऊ नये, शिक्षकांवरील अशैक्षणिक कामांचा भार कमी व्हावा, शिक्षकेतर कर्मचाऱ्यांची आवश्यक भरती व्हावी आणि शिक्षण क्षेत्रातील प्रश्नांसाठी प्रभावी पाठपुरावा व्हावा, या मुद्द्यांना त्यांच्या अजेंड्यात स्थान देण्यात आले आहे.

दरम्यान, विविध जिल्ह्यांमध्ये सुरू असलेल्या या भेटीगाठींमुळे शिक्षक मतदारसंघातील स्थानिक समीकरणे, शिक्षकांच्या अपेक्षा आणि संघटनात्मक संपर्क यांना प्रचारात महत्त्व प्राप्त झाले आहे. आगामी काळात शिक्षकांच्या प्रत्यक्ष भेटी, संवादसभा आणि विविध संघटनांशी चर्चा यांच्या माध्यमातून प्रचाराचा विस्तार करण्याची भूमिका कौस्तुभ गावडे यांच्या प्रचार यंत्रणेकडून व्यक्त करण्यात आली आहे.

शिक्षकांचे प्रश्न विधानपरिषदेत मांडण्यासाठी आपली भूमिका स्पष्ट करत गावडे यांच्याकडून शिक्षकांच्या प्रश्नांवर सातत्याने पाठपुरावा करण्याचे आश्वासन देण्यात येत आहे. त्यामुळे आगामी काळात पुणे विभागातील विविध जिल्ह्यांमध्ये होणाऱ्या त्यांच्या संपर्कदौऱ्यांकडे शिक्षक मतदारसंघाच्या निवडणुकीच्या दृष्टीने लक्ष लागले आहे.