कोल्हापुरात इकोबाजार प्रदर्शनाचे उत्साहात उद्घाटन

सेंद्रिय उत्पादने, रानभाज्या अन् पर्यावरणपूरक वस्तूंची रेलचेल; ग्रामीण महिला उद्योजिकांना हक्काचे व्यासपीठ

कोल्हापूर २४ सिटी न्यूज नेटवर्क 

किर्लोस्कर वसुंधरा आंतरराष्ट्रीय चित्रपट महोत्सवानिमित्त डॉ. व्ही. टी. पाटील फाऊंडेशनच्या वतीने आयोजित करण्यात आलेल्या ‘इकोबाजार’ प्रदर्शनाचे उद्घाटन शनिवार, दि. २४ ऑक्टोबर २०२६ रोजी श्री. श्रीराम पोतनीस यांच्या शुभहस्ते उत्साहात संपन्न झाले. या प्रदर्शनातून सेंद्रिय शेती, पर्यावरण संवर्धन आणि ग्रामीण महिला उद्योजिकांच्या उत्पादनांना बाजारपेठ उपलब्ध करून देण्याचा महत्त्वपूर्ण उपक्रम राबविण्यात येत आहे.

या इकोबाजार प्रदर्शनामध्ये सेंद्रिय भाजीपाला, भाजीपाला रोपे, शेतमाल, विविध प्रकारची धान्ये, रानभाज्या तसेच पर्यावरणपूरक उत्पादनांचे स्टॉल मांडण्यात आले आहेत. आरोग्यदायी जीवनशैली आणि पर्यावरणपूरक उत्पादनांविषयी नागरिकांमध्ये जागरूकता निर्माण करण्याच्या दृष्टीने हे प्रदर्शन महत्त्वपूर्ण ठरत आहे.

उद्घाटन समारंभास किर्लोस्कर ऑईल इंजिन्सचे सीएसआर अधिकारी शरद अजगेकर, कंटेंट क्रिएटर पार्थ वणकुद्रे, दीपक भोसले आणि दिलीप माळी यांच्यासह संस्थेचे विश्वस्त, पदाधिकारी, कमिटी सदस्य आणि कार्यकर्त्या उपस्थित होत्या.

महिला उद्योजिकांना मिळणार बाजारपेठ

ग्रामीण भागातील महिला उद्योजिकांना त्यांच्या उत्पादनांच्या विक्रीसाठी हक्काचे व्यासपीठ उपलब्ध करून देणे, सेंद्रिय शेतीला प्रोत्साहन देणे आणि पर्यावरणपूरक जीवनशैलीचा प्रसार करणे हा इकोबाजार प्रदर्शनाचा मुख्य उद्देश आहे. या उपक्रमामुळे ग्रामीण महिलांनी तयार केलेल्या उत्पादनांना ग्राहकांपर्यंत पोहोचण्याची संधी मिळत असून, त्यांच्या आर्थिक सक्षमीकरणालाही हातभार लागत आहे.

शाश्वत विकास, पर्यावरण संवर्धन आणि स्थानिक उत्पादनांचा वापर यांना प्रोत्साहन देणाऱ्या या प्रदर्शनाच्या माध्यमातून उत्पादक आणि ग्राहक यांच्यात थेट संपर्क निर्माण होत आहे.

२६ ऑक्टोबरपर्यंत प्रदर्शन सुरू

हे प्रदर्शन दि. २६ ऑक्टोबर २०२६ पर्यंत दररोज सकाळी ११ ते रात्री ८ वाजेपर्यंत स्वयंसिद्धा, साईक्स एक्स्टेंशन, कोल्हापूर येथे सुरू राहणार आहे.

नागरिकांनी प्रदर्शनाला आवर्जून भेट देऊन सेंद्रिय व पर्यावरणपूरक उत्पादनांची खरेदी करावी आणि ग्रामीण महिला उद्योजिकांना प्रोत्साहन द्यावे, असे आवाहन संस्थेतर्फे करण्यात आले आहे.